Scire debet fraternitas unanimitatis ęcclesię, quoniam unicuique fidelium valde est necessarium, ut dona per divinam largitatem sibi concessa sollerter excolat, sapienter ordinet, recte etiam dividat, ut cum euvangelicus ille paterfamilias rationem positurus advenerit, non solum ea que largitus est non auferat, set etiam pro terrenis bene ministratis, duplicata talenta et cęlestia bona concedat. His affectabilibus et dulcibus rationibus nos duo germani fratres Rotbertus et Wigo admodum delectati, facimus donum Domino Deo et sanctis ejus apostolis Petro et Paulo et ad locum Cluniacum domnoque abbati Hugoni, qui ipsi loco magis prodesse quam preesse videtur, et cunctis successoribus ejus, videlicet villam de Berziaco, quicquid nos habere videmur, cum omnibus appenditiis suis dantes, cum silvis, campis, terris cultis et incultis, pratis, pascuis, montibus et collibus, rupibus et vallibus, rivis cum ipsis suis decursibus, exitibus et regressibus, et quicquid omnino ad ipsam hereditatem adtingit, villas etiam que inibi habentur, cum servis et ancillis qui ubicumque in ipsa hereditate degunt et habitant, sive sint liberi, sive servi. Omnia hęc donamus Deo et sanctis apostolis ejus locoque predicto Cluniaco, ut habeant, teneant et possideant rectores predicti loci ab hodierno die et deinceps. Hoc autem donum facimus pro remedio animarum nostrarum, et pro patre et pro matre, simulque cunctis parentibus et amicis nostris, ut Dominus eripiat eos de penis inferni. Si denique, quod non optamus, aliquis heres aut proheres noster, vel aliqua inmissa persona hanc cartam et hoc donum infringere conatus fuerit, quod repetit non vendicet, sed iram Dei omnipotentis et sanctorum ejus incurrat, et cum Dathan et Abiron, cumque Juda, traditore Domini, vivus demergatur in infernum, nisi digne emendaverit. Carta autem hęc firma et stabilis permaneat. Actum publice Cluniaco XIIII kal. februarii, in die sabbati, anno millesimo LXII^do ab incarnatione Domini, indictione XV^ma, regnante Philippo rege, anno regni ejus secundo. S. Rotberti et Wigonis fratrum, qui hoc donum fecerunt et hanc cartam laudaverunt, et manibus propriis super altare Sancti Petri posuerunt, coadstante Hugone abbate et cuncto sancto conventu. Sed quanquam hęc pro animabus suis et suorum fecerint, summam tamen mille solidorum et eo amplius acceperunt proinde. S. Arberti de Franchilens. S. Hugonis. S. Pontii. S. Gausmari. S. Bernardi. S. Huulardi. S. Widonis. Gunbertus sacerdos ad vicem cancellarii scripsit.